బురుజు.కాం Buruju.com: Hyderabad: గోబెల్స్ Goebbels ప్రచారం అనే మాట తెలుగు రాష్ట్రాల్లో ఒక జాతీయంగా మారిపోయింది. ప్రత్యర్ధి పార్టీలు అబద్దాలను చెబుతున్నాయనే సందర్భంలో రాజకీయ నాయకులు తరచు ఆ మాటను వాడుతున్నారు. జర్మనీ నియంత హిట్లరుకు ప్రధాన అనచురుడుగా, మంత్రిగా ఉంటూ అసత్యాలను, అభూత కల్పనలను ప్రజల్లోకి బలంగా తీసుకెళ్లిన వ్యక్తే గోబెల్స్. చివరికి అతను ఆత్మహత్య చేసుకోవాల్సిన పరిస్థితి ఏర్పడింది. మీడియాను గుప్పెట్లో పెట్టుకొని అసత్యాలను నిజాలుగా ప్రచారం చేయటం ద్వారా తాత్కాలిక ప్రయోజనాలను మాత్రమే పొందగలమనే వాస్తవాన్ని సైతం గోబెల్స్ ఉదంతం రుజువు చేస్తోంది. అతను జన్మించి 2023, అక్టోబరు 29వ తేదీకి 126 ఏళ్లు అవుతోంది. ప్రస్తుత ఎన్నికల వేళ మళ్లీ గోబెల్స్ పేరును రాజకీయ నాయకులు విరివిగా వాడుతూ.. మరో వైపు అతని సూత్రాలను అనుసరిస్తున్న నేపథ్యంలో Buruju.com అందిస్తున్న ప్రత్యేక కథనం.

ఒకటో ఫొటోలో ఉన్నది గోబెల్స్ , అతని భార్య, అతని ఆరుగురు చిన్నపిల్లలు. వెనుక నిలబడింది ఎవరో తెలియదు. రెండో ఫొటో.. గోబెల్స్ కుమార్తెతో ముచ్చటిస్తున్న హిట్లర్, ఆసక్తిగా తిలకిస్తున్న గోబెల్స్. మూడో ఫొటో.. లేనిది ఉన్నట్టుగా , ఉన్నది లేనట్టుగా రేడియా ద్వారా గోబెల్స్ ప్రచారం చేస్తున్న దృశ్యం

జర్మనీలో 1897, అక్టోబరు 29వ తేదీన జన్మించిన పాల్ జోసెఫ్ గోబెల్స్ Paul Joseph Goebbels నాజీ పార్టీకి అంకిత భావంతో పనిచేశాడు. హిట్లర్ Hitler సారథ్యంలోని నాజీ Nazi పార్టీ 1933లో అధికారంలోకి వచ్చినప్పటి నుంచి సమాచార మాధ్యమాలైన రేడియో, సినిమా, నాటక రంగం, రకరకాల కళా రూపాలను అతను తన అభూత కల్పనలకు విరివిగా వాడుకొన్నాడు. హిట్లర్ ను అవతార పురుషుడిగా చిత్రీకరించాడు. రెండో ప్రపంచ యుద్దం తలెత్తి సోవియట్ సేనలు 1945లో జర్మనీలోకి ప్రవేశించంతో అదే ఏడాది ఏప్రిల్ 30వ తేదీన హిట్లరు ఆత్మహత్య చేసుకొన్నాడు. ఆ మరుసటి రోజున గోబల్స్, అతని భార్య మగ్ధా తొలుత తమ ఆరుగురు చిన్నపిల్లలను సైనేడు విషయంతో హతమార్చి తర్వాత తామూ అదే విషం సేవించి ఆత్మహత్య చేసుకొన్నారు. శత్రుసైన్యాలకు చిక్కితే చిత్ర హింసలకు గురికావాల్సివుంటుందనే వారిలా చేశారు. ఆ ఇద్దరూ చనిపోయినట్టుగా ధృవీకరించేందుకు నాజీ సైనికులు వారిని తపాకితో కాల్చి, అనంతరం పెట్రోలు పోసి మృతదేహాలను కొంత వరకు తగుల బెట్టారు.

తన అసత్య ప్రచారాలను వినేందుకు వీలుగా ప్రజలకు ఉచితంగా రేడియోలను పంపిణీ చేస్తున్న గోబెల్స్

ప్రచార కార్యక్రమాలను ఏ రీతిలో నిర్వహించుకోవాలో వివరిస్తూ గోబెల్స్ రాసిన డైరీలు అతని మరణం తర్వాత లభించాయి. వాటిని గోబెల్స్ సూత్రీకరణలుగా విశ్లేషించి కొందరు రచయితలు పుస్తకాలను రాశారు. ప్రచార పర్వానికి ప్రణాళికను రచించే దశలోనే అవి ప్రత్యర్ధుల చర్యలను ప్రభావితం చేసేలా జాగ్రత్తలు తీసుకోవటం, ప్రత్యర్ధులకు మేథో సంపత్తిని అందిచేవారిని రకరకాల మార్గాల్లో అణచివేయటం వంటివి ఆయన సూత్రీకరణల్లో ఉన్నాయి. శత్రువుపై నియంత్రణ ఎంత తీవ్రంగా ఉండాలంటే ముఖ్యమైన సమాచారాన్ని వారు తమంత తాముగానే బయటపెట్టుకొనేలా ఉండాలని, నాజీలు చేసే ప్రచారం ప్రజల్లోకి తప్పనిసరిగా చేరేలా పథక రచనలు చేయాలని వంటి పలు అంశాలు ఆయన సూత్రీకరణల్లో ఉన్నాయి. ప్రస్తుత ఉభయ తెలుగు రాష్ట్రాలోని సామాజిక మాధ్యమాల తీరును చూస్తుంటే ఆనాటి గోబెల్స్ సూత్రీకరణలు ఇక్కడ తూచా తప్పకుండా అమలవుతున్నాయనే భావన తప్పక కలుగుతుంది. సామాజిక మాధ్యమాల్లో అధికార పార్టీ వారు ఎన్ని అసత్య కథనాలను వండి వార్చినా పట్టించుకోని పోలీసు యంత్రాంగం.. ప్రతి పక్షాలవారు ఏవైనా విమర్శలు చేస్తే మాత్రం కేసులు మీద కేసులు పెట్టటం గోబెల్స్ Goebbels సిద్ధాంతాలను తప్పక గుర్తు చేస్తుంది.