బురుజు.కాం Buruju.com : Hyderabad: ఎకరా రూ.100 కోట్లు ధర పలికిన హైదరాబాదు సమీపంలోని కోకాపేటకు వేల సంవత్సరాల చరిత్ర ఉంది. ఇది 10వేల సంవత్సరాల క్రితం ఆది మానవులు నివసించిన ప్రాంతం. వారు అప్పట్లో గీసిన చిత్రాలు ఇటీవల వరకు ఇక్కడి కొండ గుహల్లోని రాళ్లపై కనిపించేవి. ఇటువంటి కొండలన్నింటిని బాంబులు పెట్టి కూల్చివేస్తుండటంతో అద్భుత చరిత్ర కూడా కాలగర్భంలో కలిసి పోతోంది. ఆది మానవులు గీసిన చిత్రాలు అంతర్థానమైనట్టేనని తెలుస్తోంది. వందల కోట్లను ఆర్జిస్తున్న హైదరాబాదు నగరాభివృద్ధి సంస్థ HMDA.. ఇక్కడి ఒక రాళ్ల గుట్ట పైకి చేరుకొనేందుకు పురావస్తు శాఖకు కనీసం ఒక క్రేనునైనా సమకూర్చకుండా చరిత్రను కాలరాచినట్టు సమాచారం. కోకాపేటలోని చారిత్రక విధ్వంసానికి సంబంధించి Buruju.com అందిస్తున్న కథనాల్లో ఇది మొదటిది.

పై ఫొటో గత ఏడాది తీసింది. దీనిలో కుడివైపు కనిపిస్తున్న గుట్ట విశాలంగా పైకి ఎక్కేందుకు అనువుగా ఉండేది. ఒకప్పుడు ఇది ఆది మానవుల ఆవాసం. దీనిపైన వారు గీసిన చిత్రాలు ఉండేవి. లేఅవుట్ కోసం హెచ్.ఎం.డి.ఎ, ఆ తర్వాత భవనాల నిర్మాణం కోసం బిల్డర్లు ఇక్కడి రాళ్ల గుట్టలన్నీ కొట్టి వేశారు. చారిత్రక సంపద ఉందని తెలిసినా కాసుల కోసం ప్రభుత్వం ఉదాసీన వైఖరి అవలంభించింది

భూముల ధరలు అనూహ్యంగా పెరగటం వల్ల కోకాపేట Kokapeta ఇటీవల కాలంలో పతాక శీర్షికల్లో కనిపిస్తున్నప్పటికీ చరిత్ర కారులు మాత్రం ఈ ప్రాంతాన్ని చాలా కాలంగా అత్యంత ప్రాముఖ్యత కలిగినదిగా గుర్తిస్తూనే వచ్చారు. అందుకు కారణం ఇక్కడ దాదాపుగా 10వేల సంవత్సరాల క్రితం.. అంటే చరిత్రకు పూర్వ యుగంలో ఆది మానవులు నివసించినట్టు నిరూపించే అనేక ఆధారాలు లభించాయి. పురావస్తు పరిశోధకులు కృష్ణ శాస్త్రి 1983లో రాసిన ‘ ప్రొటో అండ్ ఎర్లీ హిస్టారికల్ కల్చర్ ఆఫ్ ఏపీ ’ అనే గ్రంధంలో కోకాపేట విశిష్టతను వెల్లడించారు. ఇక్కడ తాము చేసిన పరిశోధనలను దానిలో ఆయన వివరించారు. అక్కడ 120 మీటర్ల కంటే ఎత్తుగా ఉన్న రాళ్ల గుట్టలపై గల గుహల్లో ఆది మానవులు గీసిన చిత్రాలను కనుగొన్నట్టు ఆ గంధ్రంలో ఆయన తెలిపి వాటి ఫొటోలను సైతం దానిలో ముద్రించారు. అక్కడి గుహ సీలింగుపైనా జంతువులను పోలిన చిత్రాలు ఉన్నాయన్నారు. ఆ సమీపంలోనే ఇంకా ఆది మానవులు ఉపయోగించిన రాతి గొడ్డళ్లు, ఇతర రాతి పరికరాలు లభించాయని వెల్లడించారు.

గుట్టలన్నీ కొట్టి వేసి ఇలా రోడ్లను వేసి లేఅవుట్ గా మార్చేశారు

గుహ ఉన్న గుట్టకు దాదాపు కిలో మీటరు దూరంలో ఆదిమానవుల సమాధుల గొయ్యిలు ఉన్నాయని, అక్కడి రాళ్ల గుట్టలపైనా వారి పెయింటింగ్స్ కనిపించాయని కృష్ణ శాస్త్రి తన గ్రంధంలో వివరించారు. కోకాపేటలో భూముల అమ్మకాలకు 2006లో నాటి ప్రభుత్వం తెరతీయటంతో అప్పటి నుంచి చారిత్రక విధ్వంసమూ మొదలయ్యింది. ప్రస్తుతం ఎకరా వంద కోట్లు పలికిన నియోపోలీస్ లేఅవుట్ లో పలు గుట్టలు ఉండేవి. భూమిని లేఅవుట్ గా మార్చే సమయంలో గుట్టలను కొట్టి వేస్తుండటంతో కొంత కాలం క్రితం పేరాల శేఖర్ రావు అనే ఆయన హైకోర్టులో పిల్ ను సైతం వేయాల్సివచ్చింది. నిపుణులతో ఒక కమిటీని ఏర్పాటు చేసి వాస్తవ పరిస్థితిని తెలియజేయాలంటూ హైకోర్టు రెండేళ్ల క్రితం సూచించగా ఇంతవరకు అధికారులు ఎవరూ అటువంటి ప్రయత్నాలను చేయనేలేదు.

పురావస్తు పరిశోధకులు కృష్ణ శాస్త్రి 40 ఏళ్ల క్రితం కోకాపేట గట్టలపైకి ఎక్కి ఆక్కడ ఆదిమానవుడు గీసిన చిత్రాల ఫొటోలను తీశారు. ఆ ఫొటోలను 1983లో వెలువరించిన తన ఒక గ్రంధంలో ముద్రించారు. గ్రంధంలోని ఒక ఫొటో ఇది

ఇక్కడి 120 మీటర్ల కంటే ఎత్తైన కొండపైకి 1983కి ముందు పురావస్తు పరిశోధకులు కృష్ణ శాస్త్రి సులువుగానే వెళ్లి అక్కడి చిత్రాలను చూడగలిగారు. ఆ గుట్టను హెచ్.ఎం.డి.ఏ చాలా వరకు కొట్టి వేయగా చరిత్ర ప్రేమికుల ఆందోళనతో కొద్ది పాటి భాగాన్ని మాత్రం విడిపెట్టింది. అలా విడిచి పెట్టిన దానిపై ఆదిమానవుల చిత్రాలు కనుక భద్రంగా ఉంటే చూడాలని పురావస్తు శాఖ 2022లో చేసిన ప్రయత్నాలు ఫలించలేదు. గుట్ట చుట్టూ ఇష్టాను సారంగా చెక్కివేయటంతో దానిపైకి ఎవరూ వెళ్లలేని పరిస్థితి నెలకొంది. అగ్నిప్రమాదాలు జరిగినప్పుడు ఉయోగించే అతి పెద్ద క్రేన్ లో కనుక వెళ్లగలిగితే కొంత ప్రయోజనం ఉండొచ్చని పురావస్తు శాఖ అధికారులు భావించారు. వారు ఇదే విషయాన్ని తెలియజేస్తూ 2022లో జూన్, ఆగస్టు నెలల్లో హెచ్.ఎం.డి.ఎ కు లేఖలు రాశారు. క్రేనును ఏర్పాటు చేయాల్సిందిగా వాటిలో వారు కోరగా హెచ్.ఎం.డి.ఎ స్పందన కొరవడింది. దీంతో చిత్రాలు గల గుహ అంతర్ధనమై పోయివుండొచ్చని, అందువల్లనే హెచ్.ఎం.డి.ఎ నుంచి సమాధానం రావటంలేదని పురావస్తు అధికారులు భావించారు. ( మరిన్ని విషయాలు రెండో భాగంలో)