బురుజు.కాం Buruju.com : (ప్రముఖులు ప్రాతినిధ్యం వహిస్తున్న అసెంబ్లీ నియోజక వర్గ కేంద్రాల చారిత్రక అంశాలను వివరిస్తూ ‘బురుజు’ అందిస్తున్న కథనాల్లో ఇది రెండోవది. ఇప్పటికే ఆంధ్ర ప్రదేశ్ ముఖ్యమంత్రి వైఎస్ జగన్ గెలిచిన ‘పులివెందుల’ Pulivendula గురించి కథనం వెలువడింది) తెలుగు దేశం అధినేత చంద్రబాబుకు చెందిన ‘కుప్పం’ కు ఒకటికి మించిన అర్ధాలు వివిధ గ్రంధాల్లో కనిపిస్తున్నాయి. తమిళంలో శివారు పల్లెలను కుప్పం అనేవారని కొందరు రాయగా, కూడలి ప్రాంతాన్ని అలా పిలిచేవారని మరికొందరు పేర్కొన్నారు. ధాన్యపు రాశి (కుప్ప) నుంచి, వ్యక్తి పేరును బట్టి కుప్పం పేరు స్థిరపడిందనే వాదనలూ ఉన్నాయి. ఆంధ్ర, తమిళనాడుతో పాటు కర్ణాటకలోను కుప్పం Kuppam పేరు గల గ్రామాలు చాలా ఉండటం వల్లనే ఇలా వివిధ రకాల సూత్రీకరణలు గ్రంధాల్లో కనిపిస్తున్నాయి.

కుప్పంలో ఏటా నిర్వహించే గంగమ్మ తల్లి జాతర

చిత్తూరు జిల్లాలోని కుప్పం అసెంబ్లీ నియోజక వర్గంలోనే కుప్పంతో పాటు రామ కుప్పం అనే మండలం కూడా ఉంది. నెల్లూరు జిల్లాలోనైతే కొత్త కుప్పం, నడిం కుప్పం, ముని కుప్పం , పెద్ద కుప్పం ఇలా చాలా కుప్పాలు కనిపిస్తాయి. అసలు ప్రస్తుత చెన్నై నగరం ఏర్పడిందే చెన్న కుప్పం అనే సముద్ర తీర గ్రామంలో. ఇదే విషయాన్ని ప్రముఖ రచయిత ఆరుద్రతో పాటు మరికొందరు చరిత్రకారులూ ధృవీకరించారు. చంద్రబాబు ప్రాతినిధ్యం వహిస్తున్న కుప్పం విషయానికి వస్తే.. ఇది ఆంధ్ర, తమిళనాడు, కర్ణాటక రాష్ట్రాల కూడలిలో ఉంటుంది కనుక ఇటువంటి ప్రాంతాన్ని కుప్పం Kuppam అంటారని వికీపీడియా పేర్కొంటోంది. ఇలా కూడలిలో కాకుండా సముద్ర తీరంలోను, ప్రధాన గ్రామాలకు అనుబంధంగాను ఉండే వాటికీ గతంలో కుప్పం పేర్లే పెట్టేవారు. అందువల్ల కూడలిలో ఉన్నదాన్ని కుప్పం అంటారనేది సరైన విశ్లేషణ కాకపోవచ్చు. కుప్పం అంటే చిన్న పల్లె, మజరా గ్రామమని ‘నెల్లూరు జిల్లా గ్రామ నామాలు’ అనే గ్రంథం చెబుతోంది. ఆయా ప్రాంతాలు, వ్యక్తుల పేర్లు కూడా చేరి కాసంగట్టు కుప్పం, మత్స్య కుప్పం వంటి పేర్లు వచ్చినట్టు దీనిలో రాశారు.

కుప్పం పట్టణానికి 16 కి.మీ. దూరంలో ఉన్న కంగుంది జమిందార్ల కోట

మత్స్యకారులు తమ పాత గ్రామాలను విడిచిపెట్టి కొత్తగా నివాసాలను ఏర్పాటు చేసుకొన్న ప్రాంతానికి కుప్పం అని పేరు పెట్టుకొనేవారని, తమ పాత గ్రామం పేరునూ దానికి చేర్చేవారని ‘ది మద్రాస్ టెర్సెంటెనరీ కమెమోరేషన్’ అనే 1939 నాటి గ్రంధంలో పేర్కొన్నారు. తిరువొట్టియార్ కుప్పం వంటి పేర్లను దీనిలో ఉదహరించారు. కుప్పం అంటే వ్యక్తి నామమని భాషా పరిశోధకులు బూదరాజు రాధా కృష్ణ తన గ్రంథం ‘ ప్రాచీనాంధ్ర శాసనాలు, పదకోస, సంగ్రహ భాషా చరిత్రలతో’ అనే గ్రంథంలో తెలిపారు. తమిళంలోని కుప్పం, కుప్పాల్ అనేది కన్నడంలో కుప్ప, కుప్పేగా మారిందని ఆయన తెలిపారు. శ్రీరంగం సమీపంలోని కన్ననూర్ కుప్పంలో 14 శతాబ్దంలో యుధ్దం జరిగినట్టుగా చరిత్రకు ఎక్కింది. చిత్తూరు జిల్లా కుప్పం చారిత్రక ప్రాంతంగాను ప్రసిద్ది. కుప్పం పట్టణానికి 16 కి.మీటర్ల దూరంలో కంగుంది కోట ఇప్పటికీ ఉంది. కంగుంది పాలకుల ప్రోత్సాహం కారణంగా ‘కంగుంది వీధి నాటకాలు’ బహుళ ప్రచారంలో ఉండేవని జయధీర్ తిరుమల రావు తన ‘ విజ్ఞాన సంపుటి’లో వెల్లడించారు.

కుప్పం ప్రాంతంలోని కంగుంది సంస్థానంలో వెల్లివిరిసిన కంగుంది బాగీ అనే చిత్తూరు యక్షగాన నాటకం ప్రసిద్ధి పొందినట్టు మిక్కిలినేని రాధా కృష్ణ మూర్తి ‘తెలుగువారి జానపద కళా రూపాలు’ లో వివరించారు. బ్రిటీష్ వారి హయాంలో ఇది నార్త్ ఆర్కాట్ జిల్లాలో ఉండేది. భాషా ప్రయుక్త రాష్ట్రాలను 1953లో ఏర్పాటు చేసినప్పుడు తెలుగు వారు ఎక్కువగా ఉన్న కుప్పం గ్రామాన్ని ఆంధ్రాలో కలిపారు. ఇది గ్రానైట్ కు ప్రసిద్ది. దీన్ని‘ కుప్పం గ్రీన్’ అని పిలుస్తుంటారు. ఏటా ఇక్కడ గంగమ్మ తల్లి జాతరను ఘనంగా నిర్వహిస్తుంటారు. కుప్పం కేంద్రంగా అసెంబ్లీ నియోజకవర్గం 1955లో ఏర్పాటుకాగా 1989 నుంచి ఇంత వరకు ఏడు సార్లు వరసగా చంద్రబాబు నాయుడు ఇక్కడి నుంచి విజయం సాధిస్తూ వచ్చారు . ఆయనకు మెజార్టీ 2004లో 59 వేలు.. 2019లో 30 వేలు లభించింది.